ბაგრატის ტაძრისა და გელათის მონასტრის კონსერვაციის მდგომარეობის საკითხის განხილვა 2013 წლამდე გადაიდო.

ამის შესახებ საქართველოს კულტურისა და ძეგლთა დაცვის მინისტრმა ნიკოლოზ რურუამ დღეს გამართულ პრეს-კონფერენცია განაცხადა.

სამინისტროს ინფორმაციით, მსოფლიო მემკვიდრეობის კომიტეტის 36-ე სესიამ განიხილა რა, ბაგრატის ტაძრისა და გელათის მონასტრის კონსერვაციის მდგომარეობის საკითხი, მიზანშეწონილად მიიჩნია, საკითხი 2013 წელს კომიტეტის 37-ე სხდომისათვის გადაიდოს.

ამასთან, კომიტეტზე დაისვა საკითხი იკომოსის ექსპერტთა ჯგუფის გაფართოებაზე, რომლებიც განხორციელებულ სამუშაოებს სწორად შეისწავლიან, რათა იუნესკოში ფაქტობრივად მეტად ზუსტი და რეალობის ობიექტურად ამსახველი დასკვა იქნას წარმოდგენილი.

მისივე ცნობით, საკითხის გადადების ინიციატივა წამოაყენა გერმანიამ, რომლის წინადადებასაც მხარი ინდოეთმა, კოლუმბიამ, იაპონიამ, კამბოჯამ და შვეიცარიამ დაუჭირეს, რის შემდეგაც კომიტეტმა გადაწყვეტილება მიღებულად ჩათვალა.

ცნობისთვის, კომიტეტის სესიის ბაგრატის ტაძრის რესტავრაციის პროექტი იუნესკოს 36-ე სესიაზე ქართულმა დელეგაციამ - საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ვაჩეიშვილმა და ეროვნული სააგენტოს იუნესკოსთან ურთიერთობის სამსახურმა წარადგინა.


თელარა გელანტია