კომპანია "ბეტა მაქსის" დირექტორის მალხაზ მირცხულავას მტკიცებით, კომპანიამ "ქართუ ბანკისგან" კრედიტის მისაღებად საჭირო ყველა ინსტანცია გაიარა.
ამის შესახებ მირცხულავამ გაზეთ "პრაიმ-ტაიმის" პრეს-კლუბში გამართულ პრესკონფერენციაზე განაცხადა და ნოდარ ჯავახიშვილის განცხადებას "ბეტა მაქსის" ხელისუფლების სატელიტობის შესახებ, აბსურდული უწოდა.
"აბსურდზე კომენტარის გაკეთება ძნელია. ოთხი თვის განმავლობაში ამ საკრედიტო ხელშეკრულების გასაფორმებლად ბანკთან მუშაობა მიმდინარეობდა. ამ პროცესმა ყველა ინსტანცია გაიარა. კერძოდ, მშენებლობის, იურიდიული, რისკების და უსაფრთხოების ექსპერტიზები. ამ დოკუმენტს საკრედიტო დეპარტამენტის 9 წარმომადგენელმა მოაწერა ხელი. ეს ხომ ნოდარ ჯავახიშვილის დროს მოხდა. ამის შემდეგ, 9 ივლისს მიღებული იქნა საკრედიტო საბჭოს ხელშეკრულება და დაიდო გენერალური ხელშეკრულება, რომელსაც ხელი თავად ნოდარ ჯავახიშვილმა მოაწერა. თუ ჯავახიშვილს რამე აინტერესებდა საკრედიტო ხელშეკრულებაზე, მაშინ დაერეკა და შევხვდებოდი, ეს ხომ პრობლემა არ იყო, მაგრამ სამწუხაროდ, 27 ივლისიდან ნოდარ ჯავახიშვილი გამოდის სატელევიზიო ეთერებში და ამას პოლიტიკურ ელფერს აძლევს, თითქოს ჩვენ ბანკისთვის ზიანის მიყენება გვსურს", - განაცხადა მირცხულავამ და კიდევ ერთხელ აღნიშნა, რომ "ბეტა მაქსმა" ბანკის მიერ წარდგენილი ყველა პირობა შეასრულა.
ცნობისთვის, საქართველოს იუსტიციის სამინისტროს აღსრულების ეროვნული ბიუროს თბილისის სააღსრულებო ბიურომ "ქართუ ბანკს" 11 609 500 დოლარის გადახდა დააკისრა.
ამის შესახებ "ქართუ ბანკის" პრეზიდენტმა ნოდარ ჯავახიშვილმა დღეს გამართულ პრესკონფერენციაზე განაცხადა და აღნიშნა, რომ საქმე ეხება სახელმწიფოს მიერ ს/ს "ქართუ ჯგუფში" დანიშნული დროებითი მმართველის მიერ ოთხ კომპანიაზე გაფორმებულ საკრედიტო ხელშეკრულებებს, რომლის საფუძველზეც "ქართუ ბანკს" 50 მლნ აშშ დოლარის კრედიტი უნდა გაეცა. აღნიშნული თანხიდან კი, 10 მლნ დოლარი "ბეტა მაქსისითვის" უნდა გადაერიცხა.
"17 აგვისტოს ხელისუფლებამ კიდევ ერთი დარტყმა მიაყენა ს/ს "ქართუ ბანკს". ამჯერად ნოტარიუს ნარგიზა მინდიაშვილის მონაწილეობით, რომელმაც უგულებელყო რა კანონის თუ სამართლიანობის ყველა პრინციპი, გამოწერა სააღსრულებო ფურცელი, რომლითაც ბანკს შპს "ბეტა მაქსითვის" 10 მლნ აშშ დოლარის და დარიცხული პირგასამტხელოს - 850 000 აშშ დოლარის გადახდა დააკისრა. საქართველოს იუსტიციის სამინისტროს აღსრულების ეროვნული ბიუროს თბილისის სააღსრულებო ბიურომ თავის მხრივ, დაამატა კრედიტორის მიერ ვითომ წინასწარ გადახდილი საფასურის - მოთხოვნის 2%, ანუ 217 000 აშშ დოლარი, აგრეთვე აღსრულების საფასურის 7% და საბოლოო ჯამში, ბანკს 7 დღის ვადაში 11 609 500 დოლარის ექვივალენტი ლარებში აქვს გადასახდელი", - განმარტა ჯავახიშვილმა და დასძინა, რომ ეს ეპოპეა წარმოადგენს ხელისუფლების ყველა შტოს მიერ ბანკის გასაკოტრებლად გატარებულ მიზანმიმართულ ღონისძიებათა ერთობლიობას, რათა "ქართუ ბანკის" ლიკვიდაციას მიაღწიონ.
