საქართველოს პრეზიდენტ მიხეილ სააკაშვილის განცხადებით, უახლოეს მომავალში საქართველოს თანამემამულეთა სრულიად მსოფლიოს ქართველთა წარმომადგენლობითი საბჭო შეიქმნება.
ამის შესახებ სააკაშვილმა დღეს პრეზიდენტის ადმინისტრაციაში უცხოეთში მცხოვრები ქართველებისთვის თანამემამულის სტატუსის დამადასტურებელი მოწმობების გადაცემისას განაცხადა.
"ძალიან მნიშვნელოვანია, რომ საქართველოს მთავრობამ, საქართველოს დღევანდელმა თაობამ ჩვენი უცხოეთში მცხოვრები თანამემამულეები არ დაკარგოს. განსაკუთრებით ეს ახალგაზრდა თაობას ეხება. ამიტომ ჩვენთვის ძალიან მნიშვნელოვანია, რომ ორმაგი მოქალაქეების სისტემა მაქსიმალურად ავამოქმედოთ. იქ კი, სადაც ორმაგი მოქალაქეობის აღება სხვადასხვა სუბიექტური გადაწყვეტილებების გამო, ვერ ხერხდება, ჩვენი თანამემამულის მოწმობა დავარიგოთ. სხვადასხვა ისტორიული გარემოებების გამო საქართველოს გარეთ ცხოვრობს უფრო მეტი მრავალეთნიკური ქართველი ერის წარმოამდგენელი, ვიდრე – საქართველოს შიგნით. ეს განპირობებულია ჩვენი ახლომდებარე ქვეყნების ისტორიული მოსახლეობით. 1990-იანი წლების ემიგრაციით და ა.შ. მაგრამ აღსანიშნავია, რომ ბოლო რამდენიმე წლის განმავლობაში საქართველოში მეტი ბრუნდება, ვიდრე – მიდის, მაგრამ ეს წინა წლების და წინა საუკუნეების ტვირთია. ჩვენთვის ეს ხალხი ერთის მხრივ დანაკარგია და მეორეს მხრივ, ეს ასევე დიდი სიძლიერეა. ჩვენ გვინდა, დანაკარგი შევამციროთ და სიძლიერის მომენტები ზემოთ ამოვწიოთ. ამიტომ ჩვენ ვხსნით საკვირაო სკოლებს ყველგან. ამმხრივ, საქართველოს ეკლესია ძალიან გვეხმარება. ჩვენ ასევე მივიღეთ გადაწყვეტილება, რომ უახლოეს თვეებში, ამ თანამემამულეთა მოწმობის საფუძველზე საქართველოს თანამემამულეთა სრულიად მსოფლიოს ქართველთა წარმომადგენლობითი საბჭო ავირჩიოთ, რომლის შტაბ-ბინა თბილისში იქნება და სადაც რეგულარული სესიები გაიმართება", - განაცხადა სააკაშვილმა.
თელარა გელანტია
