პარტია "თავისუფალი საქართველოს" განცხადებით, შინაგან საქმეთა სამინისტრომ პარტიის სამართლებრივი პოლიტიკის ხელმძღვანელ ქეთი ბექაურს აგენტი მიუგზავნა.
როგორც "პირWელს" "თავისუფალი საქართველოდან" აცნობეს, მას შემდეგ, რაც ადვოკატმა ქეთი ბექაურმა "თავისუფალი საქართველოს" მიმართ საკუთარი პოლიტიკური სიმპატიები გამოხატა და პარტიის სამართლებრივ პოლიტიკას ხელმძღვანელობს, შინაგან საქმეთა სამინისტომ მისი პოლიტიკური ნიშნით დევნა გაააქტიურა.
"15 ივნისს "თავისუფალი საქართველოს" ოფისში, შინაგან საქმეთა სამინიტროს თანამშრომლებმა ბექაურთან საკუთარი აგენტი მიაგზავნეს. ადვოკატს იგი მობილურ ტელეფონზე დაუკავშირდა და როგორც კლიენტმა, რომელსაც იურიდიული კონსულტაცია ესაჭიროებოდა, შეხვედრა სთხოვა. პიროვნება სომეხი ეროვნებისაა და როგორც თვითონ განაცხადა, რუსეთში ცხოვრობს. აღნიშნულმა პიროვნებამ ქეთი ბექაურს განუცხადა, რომ ტერორისტულ აქტებთან დაკავშირებით გარკვეულ ინფორმაციას ფლობდა და ადვოკატისგან მოითხოვდა, ეს ინფორმაცია მიეწოდებინა რომელიმე მსხვილი მედია კომპანიისთვის საქართველოში, ან საზღვარგარეთ ინტერნეტის საშუალებით, რისთვისაც ბექაურს ჰონორარის სახით, 100 000 ევროს ჰპირდებოდა. გარდა ამისა, აღნიშნული პიროვნება ითხოვდა, რომ შეხვედრის კონფიდენციალურობა დაცული ყოფილიყო და მისი პიროვნება არ გამჟღავნებულიყო. ასევე იგი ცდილობდა, ქეთი ბექაურისთვის ტელეფონის სიმ-ბარათი გადაეცა და სთხოვდა, მას მხოლოდ ამ ტელეფონით დაკავშირებოდა. უარის მიღების შემდეგ მან "თავისუფალი საქართველოს" ოფისი დატოვა", - აცხადებენ პარტიაში.
მისივე ინფორმაციით, ქეთი ბექაურმა აღნიშნული ფაქტის შესახებ მაშინვე "თავისუფალი საქართველოს" ლიდერს კახა კუკავას შეატყობინა.
პარტია "თავისუფალი საქართველო" აღნიშნულ ფაქტს დანაშაულის პროვოკაციად აფასებს და აფრთხილებს შინაგან საქმეთა სამინისტროს, მსგავსი ტიპის პროვოკაციებისგან თავი შეიკავოს.
