კოალიცია "ქართული ოცნების" ლიდერს ბიძინა ივანიშვილს აღსრულების ეროვნული ბიუროს მიერ ჯარიმების ნებაყოფლობითი გადახდისთვის მიცემული 7-დღიანი ვადა 27 ივნისამდე აქვს.

როგორც ივანიშვილის ადვოკატმა არჩილ კბილაშვილმა განაცხადა, აღსრულების ეროვნულმა ბიურომ საარსრულებო წარმოება 20 ივნისს დაიწყო და შესაბამისად, ნებაყოფლობითი გადახდის 7-დღიანი ვადა ივანიშვილს დღეის ჩათვლით აქვს.

როგორც თავად ივანიშვილი აცხადებს, იგი ჯარიმების გადახდას არ აპირებს. შესაბამისად, ხვალიდან აღსრულების ეროვნული ბიურო იძულებითი აღსრულების კონკრეტულ პროცედურებს დაიწყებს და სავარაუდოდ, ივანიშვილი სახელზე არსებულ ქონებას დააყადაღებს.

ივანიშვილისვე განცხადებით, მას არცერთ ქართულ კომპანიაში წილი არ აქვს. "ქართუ ბანკის" ბოლო წილი მან 2 მაისს შვილს უტას გადასცა, თუმცა როგორც აცხადებს, მის სახელზე გაფორმებულია უძრავი ქონება ურეკში, ჭორვილასა და ბაკურიანში.

შეგახსენებთ, რომ კონტროლის პალატის მიერ შედგენილი სამართალდარღვევათა ოქმების საფუძველზე ივანიშვილი 74 325 065 ლარით დააჯარიმდა.