თბილისის საქალაქო სასამართლომ საქართველოს კომუნიკაციების ეროვნული კომისიის გადაწყვეტილება კომპანია "გლობალ კონტაქტ კონსალტინგის" 5 ათასი ლარით დაჯარიმების შესახებ ძალაში დატოვა.
ამ გადაწყვეტილების სარეზოლუციო ნაწილი დღეს მოსამართლე თამარ ონიანის თანაშემწემ გამოაცხადა, აღნიშნულ საქმეზე სასამართლო პროცესი კი გასულ კვირას გაიმართა.
გადაწყვეტილების გამოცხადების პროცესს მარეგულირებელი კომისიის წარმომადგენლები არ ესწრებოდნენ, "გლობალ კონტაქტ კონსალტინგის" მხარე კი კომპანიის მარკეტინგისა და განვითარების დირექტორ ზურაბ ბაზლიძისა და იურიდიული დეპარტამენტის უფროსის ნატა გელაძის სახით იყო წარმოდგენილი.
გელაძის განცხადებით, აღნიშული გადაწყვეტილება უახლოეს დღეებში თბილისის სააპელაციო სასამართლოში გასაჩივრდება.
"მარეგულირებელმა ჩვენ სიხშირულ ზოლში გადაცდენის მიზეზით 5 ათასი ლარით დაგვაჯარიმა და სამართალდარღვევათა ოქმში, რომელიც კომისიამ შეადგინა, აღნიშნული იყო, რომ ჩვენ ლიცენზიით მინიჭებული უფლება დავარღვიეთ, რაც აბსურდია. გასულ კვირას გამართულ სასამართლო პროცესზე დავაყენეთ შუამდგომლობა, ჩატარებულიყო ექსპერტიზა და ხელახლა გადამოწმებულიყო სიხშირეები, თუმცა "გლობალ ტვ”-ის ყველა სასამართლო პროცესზე ისევე, როგორც ამ შემთხვევაში, ჩვენი შუამდგომლობა არ დაკმაყოფილდა. დაირღვა ზოგადი ადმინისტრაციული წესები", - განაცხადა გელაძემ.
თბილისის საქალაქო სასამართლოს გადაწყვეტილების გასაჩივრება კომპანიას 10 დღის ვადაში შეუძლია.
ამასთან, თბილისის საქალაქო სასამართლოსთან "გლობალ კონტაქტ კონსალტინგისთვის" სოლიდარობის გამოსახატავად გაერთიანება "სოლიდარობა მედიის თავისუფლებისთვის" წევრები შეიკრიბნენ.
დავით ჯალაღონია
