"არჩევნებისა და პოლიტიკური ტექნოლოგიების კვლევითი ცენტრის" ხელმძღვანელი კახი კახიშვილის შეფასებით, მოსახლეობა არჩევნებზეც ისევე ორგანიზებულად უნდა მივიდეს, როგორც აქციებზე დადის.
ამის შესახებ კახიშვილმა "პირWელს" დღეს გორში გამართული კოალიცია "ქართული ოცნების" მიერ გამართული აქციის შეფასებისას განუცხადა.
"მე ვფიქრობ, მოსალოდნელი იყო, რომ ბევრი ადამიანი მივიდოდა. რაც შეეხება იმას, იმოქმედა თუ არა კარალეთის ინცინდენტმა მოსახლეობაზე, უნდა აღინიშნოს, რომ კარალეთში მოსახლეობამ კი არ დააფიქსირა ცუდი განწყობა კოალიციის მიმართ, არამედ იქ უბრალოდ სპეციალური ჯგუფები იყვნენ შეგზავნილი, რომლებმაც ინსცენირება გააკეთეს, თითქოს კოალიციის ლიდერები სოფლიდან ხალხმა გამოყარა. ეს ყველაფერი სპეციალურად გაკეთდა. როცა მინისტრის ნათესავი ან რომელიმე საჯარო მოხელე აკეთებს მსგავს რამეს, ეს არ ნიშნავს, რომ მოსახლეობის პოზიცია ასეთია. დაშინებები თავისას აკეთებს რა თქმა უნდა, მაგრამ ვისაც ჰგონია, რომ ხალხი არ გავიდოდა დღევანდელ აქციაზე, ძალიან შეცდა. კარალეთში მომხდარი ფაქტი არის სპეციალური ტექნოლოგია, ვითომ ხალხის პოზიციის დასაფიქსირებლად", - განაცხადა კახიშვილმა და დასძინა, რომ 15 ათასი ადამიანის აქციაზე გასვლა ძალიან მნიშვნელოვანია, მაგრამ ყველაფერი არჩევნებზე გადაწყდება და ხალხმა ეს უნდა გაითავისოს.
"15 ათასი ადამიანი, რომელიც აქციაზე მივიდა, შესაძლოა, ვიღაცისთვის ცოტაა, ვიღაცისთვის ბევრი, მაგრამ მთავარი ის არის, რომ ეს ხალხი ასეთივე ორგანიზებით მივიდეს საარჩევნო ყუთებთან და საკუთარი არჩევანი დააფიქსიროს. აი, ეს არის ყველაზე მნიშვნელოვანი", - აღნიშნა კახიშვილმა.
ექსპერტი ივანიშვილის მიერ დღეს დასახელებული მაჟორიტარი დეპუტატობის კანდიდატების შეფასებისგან იკავებს.
როგორც მან "პირWელთან" საუბარში განაცხადა, "მთავარია, მაჟორიტარები მძაფრი კონკურენციისთვის კარგად მოემზადონ და თუ ხალხი იგრძნობს, რომ გაჭირვებაში კანდიდატმა არ მიატოვა, ისინიც აუცილებლად დაუდგებიან გვერდით".
"მაჟორიტარი დეპუტატობის კანდიდატების შეფასებისგან თავს შევიკავებ, რადგან ივანიშვილი კოალიციის ლიდერია და მისი გადასაწყვეტია თუ ვის აირჩევს. მე მინდა, ვთქვა, რომ თითოეული მათგანი მზად უნდა იყოს ძლიერი ოპონირებისათვის და მგონია, რომ წესით, ისინი ამისთვის მზად არიან. მაშინ, როცა ხელისუფლების მაჟორიტარი კანდიდატების პიარისთვის მუშაობს მთელი ადმინისტრაციული რესურსი და პოლიცია, ივანიშვილის კანდიდატები კარგად უნდა მოემზადონ. თუმცა თუ ხალხი იგრძნობს, რომ კანდიდატმა ისინი გაჭირვებაში არ მიატოვა, ისინიც აუცილებლად დაუდგებიან გვერდით", - განმარტა კახიშვილმა.
ინგა მურუსიძე
