ცენტრალური საარჩევნო კომისია ირიბად ადასტურებს, რომ კოალიცია "ქართულ ოცნებას" საარჩევნო რიგით ნომრად 7-ის მინიჭება არ ეკუთვნის.
ხარატიშვილის უწყების მიერ გავრცელებულ განცხადებაში ნათქვამია: "იმისთვის, რომ საარჩევნო ბლოკმა მასში შემავალი ერთ-ერთი სუბიექტის რიგითი ნომერი დაიტოვოს, ბლოკში შემავალ ყველა პარტიას 2008 წლის საპარლამენტო არჩევნებში უნდა ჰქონდეს მონაწილეობა მიღებული".
ცენტრალური საარჩევნო კომისია საარჩევნო ბლოკებისთვის რიგითი ნომრის მინიჭების პროცედურას შემდეგნაირად განმარტავს:
"საარჩევნო კოდექსის 119-ე მუხლის მე-4 და მე-5 პუნქტების თანახმად, თუ არჩევნებისთვის საარჩევნო ბლოკი შექმნეს ბოლო საპარლამენტო არჩევნებში მონაწილე პარტიებმა, ბლოკის წესდებაში მათ უნდა მიუთითონ, რომელი პარტიის რიგითი ნომრით ისარგებლებენ, ხოლო ყველა სხვა საარჩევნო სუბიექტის რიგითი ნომერი გამოვლინდება წილისყრით. ზემოაღნიშნული ნორმის თანახმად, იმისათვის, რომ საარჩევნო ბლოკმა დაიტოვოს მასში შემავალი ერთ-ერთი სუბიექტის რიგითი ნომერი, ბლოკში შემავალ ყველა პარტიას მონაწილეობა უნდა ჰქონდეს მიღებული 2008 წლის საპარლამენტო არჩევნებში. წინააღმდეგ შემთხვევაში, ბლოკის რიგითი ნომერი უნდა განისაზღვროს წილისყრით, არჩევნებამდე არაუგვიანეს 37 დღისა ანუ 25 აგვისტომდე", - ნათქვამია ცსკ-ის განცხადებაში.
ცსკ ასევე აღნიშნავს, რომ ზემოთხსენებული საკანონმდებლო ნორმა 2007 წლიდან მოქმედებს.
"აღნიშნული საკითხი არ გამხდარა საარჩევნო დავის საგანი 2008-2010 წლების არჩევნების პერიოდში და არ ყოფილა საარჩევნო რეფორმებზე სამუშაო ჯგუფის განხილვის საგანი 2009 და 2010-2011 წლებში, როდესაც ახალი საარჩევნო კოდექსის მუშავდებოდა", - აცხადებს ცენტრალური საარჩევნო კომისია.
