"ზესტაფონის" მთავარი მწვრთნელის გიორგი ჭიაბრიშვილის განცხადებით, "თუ მისი წასვლით "ზესტაფონი" გაძლიერდება, ის მზადაა გადადგეს".

ამის შესახებ ჭიაბრიშვილმა ბაქოს "ნეფთჩისთან" წაგებული მატჩის შემდეგ გამართულ პრესკონფერენციაზე განაცხადა.

"რაც ზესტაფონში ვმუშაობ, კლუბის პრეზიდენტი სატრანსფერო საქმეებში არ ერევა. ალბათ, მე არ მოვითხოვე ის ფეხბურთელები, რომლებიც გუნდს კიდევ უფრო გააძლიერებდნენ. ჩემპიონატისთვის ვემზადებით და უამრავი სამუშაო გვაქვს ჩასატარებელი. ისე, თუ დავრწმუნდები, რომ ჩემი წასვლით გუნდი უფრო გაძლიერდება, ამ შემთხვევაში გადავდგები. ჩვენ ადგილობრივ ფეხბურთელებზე ვაკეთებთ აქცენტს და სამომავლოდ თუ უფრო სხვა სიმააღლეებზეც გავედით, ლეგიონერებზეც არ ვიტყვით უარს, ოღონდ ისინი ადგილობრივებს ერთი თავით უნდა აღემატებოდნენ", - განაცხადა ჭიაბრიშვილმა.