საქართველოს პრეზიდენტის მიხეილ სააკაშვილის განცხადებით, "ვიდრე საქართველოში ჯერ კიდევ არის გაურემონტებელი სკოლები, განათლების რეფორმა ბოლომდე წარმატებულად ვერ ჩაითვლება".
ამის შესახებ პრეზიდენტმა დღეს მინისტრთა კაბინეტთან ერთად ჭიათურის რაიონის სოფელ ხრეითში მოსახლეობასთან შეხვედრისას განაცხადა.
პრეზიდენტი და პრემიერ-მინისტრი ვანო მერაბიშვილი სოფლის მოსახლეობას პრობლემების მოგვარებას დაჰპირდნენ.
"დღეს საქართველოს ახალი მთავრობის პირველი სამუშაო დღეა და მინდოდა, დილიდან ამ დღეს კაბინეტებში არ შეხვედროდნენ. ჩვენ, როცა ამ სოფელში მოვდიოდით, სპეციალურად ვერტმფრენები დაბლა დავსვით და მთელი გზა ფეხით ამოვიარეთ, რომ გვენახა თითოეული თქვენგანი რა გზას გადის ყოველ დღე ჭიათურისკენ და უკან. ჩვენ ვნახეთ სკოლა, რომელსაც ალბათ, ხელი არ შეხებია იმ დროიდან, რა დროსაც ის აშენდა. ბევრი ახალი და კარგი სკოლა ავაშენეთ, მაგრამ საქართველოში ჯერ-ჯერობით სკოლების დიდი ნაწილი ასეთი დანგრეულია. სანამ ასეთი სკოლები არსებობს, რთულია ილაპარაკო იმაზე, რომ განათლების რეფორმა ბოლომდე წარმატებულია ხალხისთვის, იმიტომ, რომ 8 წელი გავიდა "ვარდების რევოლუციიდან", ამ სკოლებში აღიზარდა თაობა, რომელსაც განახლების მსგავსი არაფერი უგრძვნია. ამ სოფელში წყალი არ არის ამოყვანილი. ზემო იმერეთში ასეთი ძალიან ბევრი სოფელია. აი, ეს არის ის, რისი ჩვენებაც მე მთავრობისთვის მინდოდა", - განაცხადა ქვეყნის პირველმა პირმა.
