“ნაციონალური მოძრაობის” საარჩევნო სიის პირველი ნომერი ეკონომიკისა და მდგრადი განვითარების მინისტრის მოადგილე გიორგი კარბელაშვილი იქნება.

ამის შესახებ “პირWელს” ინფორმირებულმა წყარომ აცნობა.

საპარლამენტო უმრავლესობის ლიდერი პეტრე ცისკარიშვილი ეკონომიკის მინისტრის მოადგილესთან დაკავშირებით მხოლოდ იმას ადასტურებს, რომ კარბელაშვილი ვაკის მაჟორიტარად იყრის კენჭს.

ცისკარიშვილის მტკიცებით, "ის, თუ ვინ იქნება "ნაციონალური მოძრაობის" საარჩევნო სიის პირველი ნომერი, არცერთ კონკრეტულ ადამიანთან მიმართებაში გადაწყვეტილი არ არის".

"ზოგადად, როდესაც ადამიანი ჩვენი გუნდის წევრია და ჩვენს მაჟორიტარად იყრის კენჭს, არასდროს არაფერია გამორიცხული, მაგრამ სიის პირველი ნომრობის შესახებ არც კარბელაშვილზე და არც არავისზე, არაფერია გადაწყვეტილი. პოლიტიკური პროცესი გრძელდება, ყველაფერს თავისი დრო და ვადა აქვს და როცა სიებზე მუშაობა დაიწყება, ყველაფერს მაშინ შეიტყობთ", - განუცხადა “პირWელს” ცისკარიშვილმა.

ამასთან, მისივე თქმით, "ნაციონალურ მოძრაობას" საარჩევნო სიაში ბევრი ახალი სახე ეყოლება.