"ალიანსი საქართველოსთვის" შესაძლოა, კოკა გუნცაძეს დაატოვებინონ. როგორც "პირWელისთვის" ოპოზიციური კულუარებიდან გახდა ცნობილი, ალიანსის წევრი პარტიები, განსაკუთრებით "ახლები" გუნცაძის ჩამოშორებას იმ მიზეზით გეგმავენ, რომ ის ირაკლი ალასანიას "პრაიმერის" ჯგუფისკენ "გადაქაჩვას" ცდილობდა. ამ საქმეში გუნცაძის გარდა, ალასანიას კიდევ ორი თანაგუნდელის - ზურა აბაშიძის და ალექსი პეტრიაშვილის ფიგურებიც მოიაზრება, თუმცა ალიანსის დატოვებასთან დაკავშირებით ამჯერად საუბარი მხოლოდ გუნცაძეზე მიდის. "ვიდრე ირაკლი ალასანია პრაიმერის ინიციატორ პარტიებთან დაიწყებდა მოლაპარაკებებს, სწორედ ეს ადამიანები დადიოდნენ ლევან გაჩეჩილაძესთან და მოსამზადებელ მოლაპარაკებებს აწარმოებდნენ. ასეთ შიდა პოლიტიკურ ვითარებაში ყოფნა ალიანსის წევრ პარტიებს არასერიოზულად მიაჩნიათ, ამიტომ ირაკლის კოკას ჩამოშორება მაინც მოუწევს", - აცხადებს წყარო. მისივე ცნობით, ალასანიას "პრაიმერის" ჯგუფისკენ "გადაქაჩვის" მცდელობა და ოპოზიციური პრაიმერის გარშემო ატეხილი სკანდალი "ახლებისა" და გუნცაძის დაპირისპირებაში მხოლოდ "ბოლო წვეთი" აღმოჩნდა; სათავეს ეს დაპირისპირება ჯერ კიდევ იმ დროიდან იღებს, როცა გუნცაძე "მემარჯვენეების" რიგებში ირიცხებოდა, ხოლო ბოლო პერიოდში უსიამოვნება მას შემდეგ გამძაფრდა, რაც ალიანსში შეიტყვეს, რომ ირაკლი ალასანია გუნცაძეს თბილისის საარჩევნო შტაბის ხელმძვანელის პოსტზე მოიაზრებდა. "პირWელის" წყაროს ინფორმაციით, თბილისის საარჩევნო შტაბის უფროსობა თავად გუნცაძესაც სურს, თუმცა ამას კატეგორიულად ეწინააღმდეგებიან "მემარჯვენეები" დავით გამყრელიძე და მამუკა კაციტაძე. წყაროს განმარტებით, ალიანსის წარმომადგენლები თვლიან, რომ ირაკლი ალასანიას მომავალი პოლიტიკური ბრძოლის სწორი მიმართულებით წაყვანას სწორედ გუნცაძე უშლის ხელს, რომელიც საზოგადოებრივი მოძრაობა "დაიცავი საქართველოს" წარმომადგენელთან ლევან გაჩეჩილაძესთან ახლო ურთიერთობებით გამოირჩევა. ამას თან ერთვის ის გარემოებაც, რომ გუნცაძე გაჩეჩილაძეს "მეგობრის" სტატუსით საკმაოდ ხშირად ხვდება და ამავე სტატუსით მერობის ერთიანი ოპოზიციური კანდიდატის გამოვლენის საკითხს დღევანდელ შეხვედრაზეც განიხილავდა. "პირWელის" კითხვაზე, რა სტატუსით შეხვდა იგი გაჩეჩილაძეს ამჯერად იმ ფონზე, როცა "ალიანსმა საქართველოსთვის" მერობის ერთიანი კანდიდატის გამოვლენის საკითხზე მიმდინარე მოლაპარაკებებზე მყარი უარი განაცხადა და დამოუკიდებლად გადაწყვიტა ბრძოლა, გუნცაძემ აღნიშნა, რომ გაჩეჩილაძეს "როგორც თანამოაზრეს და მეგობარს ხვდება”, თუმცა არ უარყო, რომ განხილვის თემას ამჯერადაც სწორედ მერობის ერთიანი ოპოზიციური კანდიდატის გამოვლენა წარმოადგენდა. ლევან გაჩეჩილაძესთან დღევანდელ შეხვედრაში "ალიანსელი" გუნცაძის მონაწილეობის შეფასებისთვის "პირWელი" ალიანსის წარმომადგენელს, "მემარჯვენეების" ერთ-ერთ ლიდერს ფიქრია ჩიხრაძეს დაუკავშირდა. "ალიანსს თავისი გზა უკვე არჩეული აქვს, სხვა დანარჩენზე კი აჟიოტაჟის ატეხვა ზედმეტია. გუნცაძეს ხომ არსად უთქვამს, "გაჩეჩილაძეს ალიანსის სახელით ვხვდებიო"?!, მან თქვა, რომ იქ მეგობრის სტატუსით იმყოფებოდა. ასე მეც დავდივარ მეგობრებთან და მგონი, ეს აჟიოტაჟის საგანი არ უნდა გახდეს. რატომ უნდა იყოს მიუღებელი ან მისაღები ალიანსისთვის ეს შეხვედრა?!", - განაცხადა ჩიხრაძემ, რომელიც "ახლებსა" და გუნცაძეს შორის დაპირისპირებას უარყოფს. რაც შეეხება გუნცაძის მიერ ალიანსის შესაძლო დატოვებას, მისი თქმით, "დატოვებს თუ არა იგი ალიანსს, გუნცაძის გადასაწყვეტია". "ვერ გეტყვით, აქვს თუ არა მას ალიანსისგან განსხვავებული მოსაზრებები, რადგან ის ალიანსში კარგა ხანია, არ გამოჩენილა", - დასძინა ჩიხრაძემ. გაჩეჩილაძის "მეგობრის" მიერ ალიანსის შესაძლო დატოვების შესახებ ინფორმაციასთან დაკავშირებით "პირWელი" თავად კოკა გუნცაძესაც დაუკავშირდა, რომელმაც ეს ინფორმაცია არ დაადასტურა და მხოლოდ ის აღნიშნა, რომ "როცა საჭიროდ ჩათვლის, განცხადებას თავად გააკეთებს".

ლევან სულაშვილი

საინფორმაციო სააგენტო "პირWელი"